અમદાવાદ: રાજ્યમાં હાલમાં ભીષણ ગરમી પડી રહી છે. ભીષણ ગરમી વચ્ચે હવામાન નિષ્ણાત અંબાલાલ પટેલની આગાહી બહાર આવી છે. તેમણે આગાહી કરી છે કે રાજ્યમાં હવામાનમાં ફેરફાર થશે. જેમાં ખાસ કરીને મે મહિનામાં વરસાદની આગાહી કરવામાં આવી છે. અંબાલાલ પટેલના જણાવ્યા અનુસાર, 8 મેની આસપાસ ગાજવીજ સાથે વરસાદ પડી શકે છે. આ સાથે તેમણે કહ્યું કે ઉત્તર ગુજરાતમાં ગાજવીજ અને પવન વધુ રહેશે.
અખાત્રીજથી આંધી-પવનો જોવા મળશે
હવામાન નિષ્ણાત અંબાલાલ પટેલની આગાહી મુજબ, મે મહિનામાં ધૂળિયું વાતાવરણ રહેશે. કચ્છના કેટલાક ભાગોમાં 45 કિમી પ્રતિ કલાકની ઝડપે પવનો ફૂંકાશે. અમદાવાદ, ગાંધીનગરમાં હવામાન બદલાશે અને સૌરાષ્ટ્રમાં વરસાદ પડશે. આગાહી મુજબ, અખાત્રીજના અખાતમાંથી પવનો જોવા મળશે. 25 મે થી 4 જૂન દરમિયાન અરબી સમુદ્રમાં ચક્રવાતી પરિભ્રમણ બનશે.
હવામાન વિભાગે શું આગાહી કરી છે?
હવામાન વિભાગની આગાહી મુજબ, આજથી બે દિવસ ગરમ અને ભેજવાળા પવન ફૂંકાય તેવી શક્યતા છે. આજે અને કાલે કચ્છ-સૌરાષ્ટ્રમાં ભારે પવન ફૂંકાશે. મધ્ય અને ઉત્તર ગુજરાતમાં ધૂળના વાદળો ઉડાડતા પવનો ફૂંકાશે. ગાંધીનગર, અમદાવાદ, કચ્છ, બનાસકાંઠા, પાટણ, જામનગર, પોરબંદર, દ્વારકા, ગીર સોમનાથમાં પણ ધૂળના વાદળો સાથે પવન ફૂંકાશે. રાજ્યમાં પશ્ચિમ અને ઉત્તરપશ્ચિમ તરફથી ફૂંકાતા પવનોને કારણે, આગામી પાંચ દિવસ સુધી તાપમાન 40 થી 45 ડિગ્રીની આસપાસ રહેશે. દરિયાકાંઠાના વિસ્તારોમાં ગરમ અને ભેજવાળા પવનો ફૂંકાઈ શકે છે.
પરેશ ગોસ્વામીની આગાહી શું કહે છે?
પરેશ ગોસ્વામીની આગાહી મુજબ, હાલમાં તાપમાનમાં વધારો થયો છે અને આગામી દિવસોમાં પણ ગરમીનું મોજું જોવા મળશે. મે મહિનામાં બે થી ત્રણ વખત પ્રી-મોન્સૂન એક્ટિવિટી જોવા મળી શકે છે. એપ્રિલ મહિનામાં પ્રી-મોન્સૂન એક્ટિવિટી જોવા મળશે નહીં. રોહિણી નક્ષત્ર 25 મે થી શરૂ થશે, અને આ સમયગાળા દરમિયાન પૂર્વ-ચોમાસાની પ્રવૃત્તિની ઉચ્ચ સંભાવના છે.
